Dil ki baatein..

Tehrna chahe jaaye kabhi dil kuch der, to tehrne do use

Tum bhi kuch der tehr jao.. 

Mehsus karo us hawa ko, jo tumhare kaano ko chuke gujar rahi hai 

Kuch kahe rahi hai tumse shayad, suno.. 

Suno us dil ki dhadkan ko jise tum behla phusla ke mana na sake.. 

Yaad karo vo saare pal jab khud ko tum hasa na sake.. 

Kya koi baat hai jo tum khudse chupa rahe ho? 

Kyun khud ko yun jabardasti mana rahe ho? 

Udas hona laazmi hai, aankhein nam hona bhi

Par khudko kho dena laazmi nahi, laazmi nahi dil main daba gam hona bhi.. 

Laazmi hai mehsus karna us dard ko jise koi samhaj na saka 

Laazmi nahi us dard ke sath jeena, jise tu seh na saka.. 

Ek sawal khud se karo, kya ye jaruri hai? 

Kya ye zindagi in khayalo ke bin adhuri hai

Jawab shayad na mile, par bahut kuch jaan jaoge

Kuch Khudko tum pehchan jaoge.. 

Khudse to tum roj ladte hai, ek din duniya se ladke dekho

Vo jo dil kehta hai karke dekho.. 

Apne khayalo ko tum pankh laga udne do

Kuch to log kahenge, unhe kehne do..

                 -Vaibhav Mundra

Kyun!

Kyun hum bas chale jaa rahe hai
Bina kisi khayal ke, bina kisi khawab ke.. 
Bina kisi humsafar, bina kisi sath ke.. 
Kyun gum-sum sa hai ye shabab aajkal
Kyun khudme simta hai sabka mehtab aajkal.. 

Kyun bhul gaye hai hum muskurana chero ko dekh kar
Kya dil ke galiyaro main gam ka shor bahut hai.. 
Kyun sang baithe musafiro se ab hum baat nahi karte 
Kya khudki manjil ka hume khauf bahut hai..

Kyun ab koi nahi likhta in nadiyo baadlon aur sitaron ke baare main
Rango se ye ber kyun hai.. 
Jab talash nahi hai kisi jawab ki hume
To mann main sawalo ki lehr kyun hai..

Kyun vo purane dosto se hum bichad gaye hai
Kya khudki kambiyabo se hum aur peechad gaye hai..
Kyu kaid hai hum khudki aajadi mai
Kya ab bhi koi kasar baaki hai khudki barbaadi main..

Kya ab ek naya daur aayega, ya sab sambhal jayenge 
In sawalo ka koi jawab milega, ya hum aur ulhaj jayenge.. 
Milenge jarur phr se ek maud par jaakar hum
Dekhna ye hai, rukenge, ya phr vaha se uhi gujar jayenge.. 

                    - Vaibhav Mundra

IS DIL MAIN THODA SUKOON BHARO..

Zindagi ki iss bhag daud mein
Kuch pal saans lo tum
Mana masruf ho bahut
Par is dil ko thoda sukoon do tum

Na jaane kitne bojh hai is par
Na Jane kitno ke dosh hai is par
Na Jane ye kitna roya hai
Na jaane kya kabhi Chen se soya hai?
Do pal baitho, baat karo tum
Is dil main thoda sukoon bharo tum

Maana khaweshien hai hazar
Aur jeb tumhari khali hai
Par kisne is duniya main
Har cheez paa li hai
Kuch pal raashan aur bacho ki chinta chodo
Kuch pal bhut bhavshiye se naata todo
Har pal chunotiyon se ladte ho
Kya kabhi is dil pe rehm karte ho?

Maana mehbob tumhara Ruth gaya
Tumhari mohabbat ka phool tut gaya
Raat bhar tum roye ho
Din main bhi khoye khoye ho
Jab vo tanha raatein bit gayi, phr naya din aaya hai
Phr Kyun gam ka saya hai?

Ho gayi galti, ab khudko maaf karo
Intekaam bhare is dil ko saaf karo
Murat nahi ho tum koi pathar ki
Ab is dil main thoda sukoon bharo

Mushkilo main uljhe rehte ho
Kabhi mushairo main jaake dekho
Kaha daulat ke Sur taal sunte ho
Kabhi sukoon ka geet gaake dekho
Kuch pal in bacho ke sath khelo
Kuch pal in bagicho main tehlo
Thodi mohabbat khudse karo
Aur is dil main thoda sukoon bharo
Is dil main thoda sukoon bharo..

         -VAIBHAV MUNDRA

MAA

Phr us tasveer ko leke baitha, gale lagaya
aankhe royi, dil ghabraya
sirahane uski goud main kitna sukoon tha
kya batau doston, vo lamha kitna haseen tha

Mere ek aawaj main chale aana
kahi jaane pe ghabrana
kabhi akhraya na maa ko gussa mera
gusse main bhi utne hi pyaar se khilana

Zindagi main sahi galat ka pehlu bataya
phle chalna, phr daudna sikhaya
mene tab bhi muskurate dekha hai maa ko
jab mene uske niwale pe apna haq jataya

Duniyadari se anjaan
bahut mehfoos tha main vaha
dheer-dheere samhaj gaya
na mandir na masjid, mera khuda vahi
mere maa hai jaha

Mere khawab muqambal karne ki
mujhse jayada koshish uski thi
main kabhi nahi jaan paaya
kaise mere har khawaish ko
bin bole pura karti thi

Maa ki vo pyaari hasi dekhne ko tarsa hu
uske aachal ki chav main khelne ko tarsa hu
aaj phr bacha banne ka mann karta hai
bacha banke, maa kehne ko tarsa hu

                      -VAIBHAV MUNDRA

Aaina

Umar ka ye asar
Ya dundhli hai mere nazar
Ya Yaad nahi is udas se chere ko
Kabhi dekha ho agar

Baaton se anjan sa
Aaina hu bezuban sa
Bhavnaye vyakt kar
Shayad Ho itminan sa

Aap hi tu sawal hai
Bhitar tere jawab hai
Mere kisi gehrai mein
Tere ek pehchan hai

Hasi us muskan ko
Dubara tum sawar lo
Mushkile to aayegi
Jab jeet ko taeyar ho

Baat mere maan tu
Le manjeel ko than tu
Khuda tere sath hai
Bas bhar le ek udan tu

Waqt aisa bhi aayega
Gam mein khud ko payega
Zindagi isi ka naam hai
Ye baat pehchan jayega

Sahi galat ka phark
Haar jeet ka tark
Galtiya sudharna
Haar na tu maanna

Khusiyon ko talashta
Likte hue ek dastan
Kamiyab ho jayega
Mat bhul tera rasta
Mat bhul tera rasta..

                       - VAIBHAV MUNDRA